சீனா ஈஸ்டர்ன் ஏர்லைன்ஸ் நிறுவனம் சீன மக்கள் குடியரசின் சாங்காயில் சாங்காய் ஹோன்ஜியோ பன்னாட்டு வானூர்தி நிலையத்தில் கட்டப்பட்டுள்ள சீனா ஈஸ்டர்ன் ஏர்லைன்சின் கட்டிடத்திலிருந்து இயங்கும் வான்வழிப் போக்குவரத்து நிறுவனம் ஆகும். இது உள்நாட்டு, வட்டார மற்றும் பன்னாட்டு வான்வழிச் சேவைகளை வழங்கி வரும் முதன்மையான சீன நிறுவனமாகும். இதன் முதன்மை முனைய மையங்களாக சாங்காய் புடோங் பன்னாட்டு வானூர்தி நிலையம், சாங்காய் ஹோன்ஜியோ பன்னாட்டு வானூர்தி நிலையங்களும் இரண்டாம்நிலை முனைய மையங்களாக குன்மிங் சாங்சுயி பன்னாட்டு வானூர்தி நிலையமும் சியான் சியான்யங் பன்னாட்டு வானூர்தி நிலையமும் விளங்குகின்றன. ஏற்றிச் செல்லும் பயணிகள் அடிப்படையில் சீனாவின் இரண்டாவது மிகப்பெரும் வான்சேவையாளராக விளங்கும் இந்நிறுவனம் சந்தை மதிப்பீட்டளவில் உலகின் மூன்றாவது பெரும் வான்சேவை நிறுவனமாக உள்ளது. தனது துணை நிறுவனமான சாங்காய் ஏர்லைன்சுடன் இசுக்கைடீம் கூட்டணியில் சூன் 21, 2011இல் இணைந்தது. 2010இல் சீனா ஈஸ்டர்ன் ஏர்லைன்சு 64.93 மில்லியன் உள்ளூர் மற்றும் பன்னாட்டு பயணிகளை ஏற்றிச் சென்றது. இதே ஆண்டில் நிகர இலாபமாக CNY5.3 பில்லியன் ஈட்டியது. Wikipedia