BNP Paribas, ֆրանսիական ֆինանսական կոնգլոմերատ, Crédit Agricole-ի, Société Générale-ի և Groupe BPCE-ի հետ մեկտեղ կազմում է այդ երկրի բանկային շուկայի «մեծ քառյակը»։ 2018 թվականին իր ունեցած ակտիվների ծավալով աշխարհի խոշորագույն բանկերի շարքում զբաղեցրել է իններորդ տեղը։ 2010 թվականին Global Finance ամսագրի հրատարակած աշխարհի 50 ամենահուսալի բանկերի ցանկում գրավել է 18-րդ տեղը։ 2011 թվականից ներառված է համաշխարհային մասշտաբով համակարգային նշանակություն ունեցող բանկերի շարքում։ Համարվում է Եվրոպայի խոշորագույն և աշխարհի յոթերորդ բանկը։ Կազմավորվել է 2000 թվականին Փարիզի ազգային բանկի և Paribas բանկի միաձուլման արդյունքում։ Գրանցված է Euronext Paris բորսայի առաջին շուկայում ու Euro Stoxx 50 բորսային շուկայի ինդեքսում, ինչպես նաև ֆրանսիական CAC 40 index ինդեքսում։ BNP Paribas-ը ինչպես հատավճարային, այնպես էլ ներդրումային ծառայություններ է մատուցում 30 միլիոնից ավելի հաճախորդների Ֆրանսիայում, Իտալիայում, Բելգիայում ու Լյուքսեմբուրգում։ Նրա դուստր ընկերությունները գործում են նաև Լեհաստանում, Ուկրաինայում, Թուրքիայում, Հյուսիսային Աֆրիկայում։ Հյուսիսային ու Հարավային Ամերիկաներում էլ հանդես է գալիս Bank of the West բրենդով։ Wikipedia