யுயேண்டே மோடார்சு கம்பனி கொரியாவின் ஓர் தானுந்து தயாரிப்பாளராகும். இதன் துணை நிறுவனமான கியா மோட்டார்சுடன் இணைந்த யுயேண்டே கியா ஆட்டோமோடிவ் குழுமம் 2009ஆம் ஆண்டில் உலகின் நான்காவது மிகப்பெரும் தானுந்து தயாரிப்பாளராக விளங்குகிறது. மேலும் அவ்வாண்டு நிலவரப்படி உலகில் மிக விரைவாக வளர்ந்து வரும் தானுந்து தயாரிப்பாளருமாகும். 2008இல் கியா இல்லாமலே உலகில் எட்டாவது நிலையில் இருந்தது. தென் கொரியாவின் சியோலைத் தலைமையகமாகக் கொண்டு உல்சானில் ஆண்டுக்கு 1.6 மில்லியன் அலகுகள் தயாரிக்கக்கூடிய உலகின் மிகப்பெரிய ஒருங்கிணைந்த தானுந்து தயாரிப்பு தொழிற்சாலையை இயக்குகிறது. இந்த நிறுவனத்தில் உலகெங்கும் ஏறதாழ 75,000 தொழிலாளர்கள் வேலை செய்கின்றனர். யுயேண்டே வண்டிகள் 193 நாடுகளில் 6000 முகவர்கள் மற்றும் காட்சிக்கூடங்கள் மூலம் விற்பனை செய்யப்படுகின்றன. 2010ஆம் ஆண்டில் யுயேண்டே உலகளவில் 1.7 மில்லியன் தானுந்திகளை விற்றுள்ளது. Wikipedia