ఇంటర్నేషనల్ బిజినెస్ మెషీన్స్ ఒక అమెరికన్ బహుళజాతి సంస్థ. దీనినే బిగ్ బ్లూ అనే ముద్దుపేరుతో కూడా పిలుస్తారు. దీని ప్రధాన కార్యాలయం ఆర్మాంక్, న్యూయార్క్ లో ఉంది. ఇది 175 కి పైగా దేశాలలో పనిచేస్తుంది. పబ్లిక్ స్టాక్ మార్కెట్ లో నమోదు అయి ఉన్న కంపెనీ. ఐబిఎం ప్రపంచంలోనే అతిపెద్ద పారిశ్రామిక పరిశోధనా సంస్థ. దీనికి సుమారు డజను దేశాలకు పైగా 19 పరిశోధనా కేంద్రాలు ఉన్నాయి. 1993 నుంచి 2021 దాకా సుమారు 29 సంవత్సరాల పాటు అత్యధిక అమెరికన్ పేటెంట్లు కలిగిఉన్న సంస్థ. ఈ సంస్థ 1911లో కంప్యూటింగ్-టాబ్యులేటింగ్-రికార్డింగ్ అనే పేరుతో ప్రారంభమైంది. 1924 లో దీనిని ఇంటర్నేషనల్ బిజినెస్ మెషీన్స్ అని పేరు మార్చారు. 1960, 70 దశకాల్లో సిస్టం 360 ఆధారిక మెయిన్ ఫ్రేమ్ కంప్యూటర్లను అభివృద్ధి చేయడం ద్వారా కంప్యూటింగ్ పరికరాల ఉత్పత్తిలో అగ్రస్థానంలో నిలిచింది. అప్పట్లో అమెరికాలో 80 శాతం, ప్రపంచ వ్యాప్తంగా 70 శాతం కంప్యూటర్లను ఈ సంస్థే తయారు చేసేది. 1981 లో మొదటిసారిగా ఐబిఎంపర్సనల్ కంప్యూటర్ పేరుతో మైక్రోకంప్యూటర్లను మార్కెట్లో ప్రవేశపెట్టింది. ఇది మైక్రోసాఫ్ట్ సంస్థ అభివృద్ధి చేసిన డాస్ ఆపరేటింగ్ సిస్టం సహాయంతో పనిచేసేది. ఇప్పటికీ మైక్రోసాఫ్ట్ తయారు చేసిన సాఫ్ట్‌వేరు వ్యక్తిగత కంప్యూటర్ల మార్కెట్‌ను శాసిస్తుండటం గమనార్హం. Wikipedia