Marks and Spencer plc is 'n Britse multinasionale kleinhandelonderneming wat sy hoofkwartier in die City of Westminster, Londen het. Sy aandele word op die Londense Effektebeurs genoteer, terwyl dit ook deel uitmaak van die FTSE 100-indeks. Die onderneming, wat oorspronklik in 1884 deur Michael Marks en Thomas Spencer in Leeds gevestig is, fokus op klere, binnenshuise toerusting en luukse kosprodukte. In 2008 het M&S begin om ook kosprodukte van bekende handelsmerke by sy portefeulje in te sluit. Tans is daar sowat 979 M&S-winkels in al vier lande van die Verenigde Koninkryk, insluitende 615 winkels wat hulle tot kos beperk. In 1998 was Marks & Spencer die eerste Britse kleinhandelonderneming wat met 'n voorbelastingwins van meer as £1 miljard afgesluit het. Vervolgens het M&S se wins egter skielik begin daal - 'n ontwikkeling wat as 'n onverwagte verrassing vir die onderneming, sy aandeelhouers, kleinhandelontleders en sakejoernaliste gekom het. In November 2009 het die onderneming bekend gemaak dat die uitvoerende voorsitter van M&S, Stuart Rose, vroeg in 2010 deur Marc Bolland, gewese voorsitter van die supermarkketting Morrisons, vervang sou word. Wikipedia