ఆయిల్ అండ్ నేచురల్ గ్యాస్ కార్పొరేషన్ ఒక భారత ప్రభుత్వ బహుళజాతి ముడి చమురు, గ్యాస్ ఉత్పత్తి సంస్థ. ఒఎన్‌జిసిని 1956, ఆగష్టు 14 న భారత ప్రభుత్వం స్థాపించింది. దీని రిజిస్టర్డు కార్యాలయం న్యూ డిల్లీలో ఉంది. ఇది పెట్రోలియం, సహజ వాయువు మంత్రిత్వ శాఖ పరిపాలనా నియంత్రణలో భారత ప్రభుత్వ యాజమాన్యంలోని సంస్థ. ఇది దేశంలో అతిపెద్ద ముడి చమురు, సహజవాయువు అన్వేషణ, ఉత్పత్తి సంస్థ. భారత ప్రభుత్వ రంగ సంస్థల్లో అత్యధికంగా లాభం ఆర్జించే సంస్థ ఇది. భారత ప్రభుత్వం ఇందులో 74 శాతం వాటా కలిగి ఉంది. ఇది ఆసియాలోనే అతి పెద్ద సంస్థల్లో ఒకటి. చమురు కోసం క్రియాశీలకంగా అన్వేషణలు కొనసాగిస్తుంది. ఇది భారతదేశ ముడి చమురులో 70% దాని సహజ వాయువులో 84% ఉత్పత్తి చేస్తుంది. 2010 నవంబరులో భారత ప్రభుత్వం ఓఎన్‌జీసీకి మహారత్న హోదా ఇచ్చింది. భారత ప్రభుత్వం నిర్వహించిన ఒక సర్వేలో 2019-20 ఆర్థిక సంవత్సరానికి ఓఎన్‌జీసీ భారతదేశంలో అతిపెద్ద లాభదాయక ప్రభత్వరంగ సంస్థ గా నిలిచింది. ఇది భారతదేశంలోని 26 అవక్షేప బేసిన్లలో హైడ్రోకార్బన్ ల కోసం అన్వేషించడం వాటిని వెలికితీసేపనిని నిరంతరం కొనసాగిస్తుంది. దేశంలో 11,000 కి.మీ. పైపులైన్లను నిర్వహిస్తుంది. ఓఎన్‌జీసీ అంతర్జాతీయ అనుబంధ సంస్థ ఒఎన్‌జిసి విదేశ్ ప్రస్తుతం 17 దేశాలలో ప్రాజెక్టులను కలిగి ఉంది. Wikipedia