பெட்ரோலியோ பிரேசிலீரோ எசு. ஏ. அல்லது பெட்ரோபிராசு ஆற்றல் தொழிற்துறையில் பகுதி அரசுடைமையான பிரேசிலிய பன்னாட்டு நிறுவனமாகும். இதன் தலைமையகம் இரியோ டி செனீரோவில் உள்ளது. தெற்கு அரைக்கோளத்தில் பங்குச்சந்தை முதலீட்டில் மிகப்பெரிய நிறுவனமாக விளங்குகிறது. 2011இல் பணவரவுகளைப் பொறுத்து இலத்தீன அமெரிக்காவின் மிகப் பெரிய நிறுவனமாக மதிப்பிடப்பட்டது. பெட்ரோபிராசு 1953இல் நிறுவப்பட்டது. 1997இலிருந்து இது பிரேசிலில் பாறை எண்ணெய், எரிவளித் துறையில் சட்டபூர்வ ஏகபோகத்தை இழந்தது. இருப்பினும் ஒருநாளைக்கு 2 பில்லியன் பேரல்கள் சமனான பாறை எண்ணெயை வெளிப்படுத்தும் பெட்ரோபிராசு பிரேசிலின் குறிப்பிடத்தக்க எண்ணெய் தயாரிப்பு நிறுவனமாக விளங்குகிறது. இதற்கு பாறைநெய் தூய்விப்பாலைகளும் எண்ணெய் சரக்குப் கப்பல்களும் சொந்தமாக உள்ளன. எண்ணெய்வழிப் பொருட்களை விற்கும் முதன்மை நிறுவனமாகவும் உள்ளது. உலகில் ஆழ்நீர் மற்றும் மீயாழ்நீர் பாறைநெய் வெளிப்படுத்தலில் மேம்பட்ட தொழினுட்பத்தை கையாள்வதில் முன்னணியில் உள்ளது. செப்டம்பர் 2010இல், வரலாற்றிலேயே மிகப்பெரிய பங்கு விற்பனையாக, பெட்ரோபிராசு பிரேசிலின் பங்குச்சந்தையில் US$72.8 பில்லியன் மதிப்புள்ள தனது பங்குகளை விற்றது. உடனடியாக பெட்ரோபிராசு இந்த விற்பனை மூலமாக சந்தைப்படுத்தல் முதலீட்டில் உலகின் நான்காவது பெரிய நிறுவனமாக ஆனது. Wikipedia