सोहु निगम एक चिनियाँ इण्टरनेट कम्पनी हो जसको प्रधान कार्यालय राजधानी बेइजिङको, हैडियान जिल्लामा अवस्थित सोहु इण्टरनेट प्लाजामा रहेको छ। सोहू र यसका सहायक कम्पनीहरूले विज्ञापन, एक खोज संयन्त्र, अनलाइन बहुखेलाडी खेल र अन्य सेवाहरू प्रस्ताव गर्दछन्। यसलाई क्रमशः सन् २००९ र २०१० मा फर्च्युनले विश्वको तेस्रो र बाह्रौँ-सबैभन्दा तिव्र बृद्धि हुने कम्पनीको रूपमा नामकरण गरेको थियो। कम्पनीका हालका प्रमुख कार्यकारी अधिकृत तथा संस्थापक झाङ छायोयाङ हुन्। कम्पनीको प्रधान कार्यालय जनवादी गणतन्त्र चीनको राजधानी बेइजिङमा अवस्थित छ। सन् २०१२ मा कम्पनीले ७ हजार भन्दा बढी कर्मचारीहरूलाई रोजगारी प्रदान गरेको थियो। सोहुका उत्पादनहरूमा सोहू फिनयिन प्रविष्ट विधि, सोहु वुबी प्रविष्ट विधि, सोगौ सङ्गीत बाकस, सोगौ ब्राउजर, सोगौ रङ्गीन दूरदर्शन, स्वतन्त्र खोज इञ्जिन सोगौ र अनलाइन खेल पोर्टल छाङ्यु समावेश छन्। यो चीनको सर्वाधिक लोकप्रिय वेबसाइटहरू मध्येको एक हो। सोहु सन् २००८ को बेइजिङ ओलम्पिक खेलहरूको एक मात्र इण्टरनेट प्रायोजक र ओलम्पिक खेलको इतिहासमै पहिलो इण्टरनेट सामग्री प्रायोजक पनि हो। सोहुले आफ्नो पहिलो पृष्ठको शीर्षकमा चीनको सबैभन्दा ठूलो पोर्टल वेबसाइट भएको दाबी गरेता पनि, यसको अलेक्सा वरियता, समान पोर्टल थङ्सिन र सिनाको भन्दा कम छ। Wikipedia