Voestalpine AG is 'n Oostenrykse aandelemaatskappy met wêreldwye belange in die staal- en tegnologiebedryf. Die onderneming, wat sy hoofkwartier in Linz in die deelstaat Opper-Oostenryk het, is in 1995 gevestig en het sy oorsprong in die staalvervaardiger VÖEST, 'n onderneming wat in 1946 as deel van Oostenryk se genasionaliseerde sleutelbedrywe in die nywerheidsektor gestig is. Voestalpine het belange in 'n vyftigtal lande, met sowat 500 dogterondernemings en aanlegte, en omstreeks 51 600 medewerkers. Sy aandele word sedert 1995 op die Weense Effektebeurs genoteer. In die fiskale jaar 2017/18 het Voestalpine se omset sowat €12,9 miljard beloop. Die Suid-Afrikaanse dogteronderneming voestalpine VAE SA Ltd het sy hoofkwartier in die nywerheidsgebied van Isando in Gauteng, met strategiese sake-eenhede in Isando en Kimberley. Wikipedia